नागमठाण येथील घटना; एकाविरुद्ध गुन्हा
वैजापूर: शेतातून ट्रॅक्टर नेल्याच्या कारणावरून इसमावर कुऱ्हाडीने प्राणघातक हल्ला करून घर पेटवून दिल्याची घटना वैजापूर तालुक्यातील नागमठाण येथे घडली. याप्रकरणी एकाविरुद्ध वीरगाव पोलिस ठाण्यात गुन्हा दाखल करण्यात आला आहे.
सोपान चामले असे घटनेत गंभीर जखमी झालेल्या इसमाचे नाव असून रवींद्र हंसराज तांबे (रा.नागमठाण) असे गुन्हा दाखल करण्यात आलेल्याचे नाव आहे. याबाबत पोलिसांनी दिलेल्या माहितीनुसार, सोपान चामले व त्यांची पत्नी मंगल हे दोघेही नागमठाण शिवारातील शेत गट क्रमांक ५८ मधील शेतात रहिवासास आहेत. दरम्यान रवींद्र तांबे व सोपान चामले यांचा मागील काही दिवसांपासून शेतीचा वाद सुरू होता.
नेमक्या याच वादातून रवींद्रने सोपान चामले यांच्यावर शेतात ट्रॅक्टर घेऊन जाण्याच्या कारणावरून १५ मार्च रोजी दुपारी दोन वाजेच्या सुमारास कुऱ्हाडीने प्राणघातक हल्ला केला. या हल्ल्यात सोपान चामले हे गंभीर जखमी झाले. एवढ्यावरच न थांबता रवींद्र याने त्यांच्या राहत्या पत्र्याच्या घराला देखील आग लावून दिली.
घटना घडताच सोपान यांना रुग्णालयात नेण्यात आले. प्रथमोपचार करून त्यांना पुढील उपचारासाठी छत्रपती संभाजीनगर येथील रुग्णालयात हलविण्यात आले. याप्रकरणी त्यांच्या पत्नी मंगल चामले यांनी दिलेल्या फिर्यादीवरून वीगाव पोलिस ठाण्यात रवींद्र तांबे याच्याविरुद्ध वेगवेगळ्या कलमान्वये गुन्हा दाखल करण्यात आला आहे.
Social Plugin