योजनेची वर्षपूर्ती होऊनही ठेवले 'झुलवत'
विधानसभा निवडणुकीपूर्वी राज्य शासनाने 'मुख्यमंत्री माझी लाडकी बहिण योजनेचे' जोरदारपणे लाॅंचिग केले. एकीकडे शासनाने लाडक्या बहिणींना खुश करण्याचा प्रयत्न केला असता तरी दुसरीकडे मात्र अंगणवाडी ताईंच्या प्रोत्साहन भत्त्याचे भिजत घोंगडे ठेवून रोष ओढवून घेतला आहे. शासनाने रक्षाबंधनाच्या पार्श्वभूमीवर बहिणींना अनुदान देऊन 'रक्षाबंधन गिफ्ट' दिले खरे; परंतु अंगणवाडी ताईंचे काय? असा प्रश्नही उपस्थित होत आहे.
सध्या मतचोरीवरून देशासह राज्यात धुरळा उडालेला असल्यामुळे राज्यकर्त्यांना ताईंच्या प्रोत्साहन भत्त्याकडे लक्ष द्यायला मिळतो की नाही? हा मोठा प्रश्न आहे. एकीकडे बहिणींचे अनुदान तर दुसरीकडे ज्या लाडक्या बहिणींचे अर्ज ऑनलाईन भरून सबमिट केले त्या अंगणवाडी 'ताईंना'ही रक्कम देण्यापासून वंचित ठेवले आहे. योजना सुरू होऊन वर्ष उलटले. परंतु त्यांच्या पदरी अजूनही प्रोत्साहन भत्ता पडायला तयार नाही. परिणामी या ताईंची अवस्था संजय गांधी निराधार योजना, श्रावणबाळ योजनेचा लाभार्थ्यांसारखी होते की काय? असे प्रश्नचिन्ह निर्माण झाले आहे.
अंगणवाडी सेविकांना कामाचे पैसे कधी मिळणार? असा सवाल उपस्थित केला जात आहे. विधानसभा निवडणूक झाल्यानंतर शासनाने नवीन नियम लागू करून बहुतांश लाडक्या बहिणींना अपात्र करण्यात आले. त्यामुळे शासनाच्या निकषांत ज्या बहिणी पात्र आहेत. अशानांच आता हे अनुदान मिळणार आहे.नव्या निकषांनुसार, हे पैसे जमा होतील. सुरुवातीला सरसकट महिलांसाठी असणारी ही योजना आता निकषाच्या जाळ्यात अडकत आहे. लाडकी बहीण योजनेची जुलै २०२४ महिन्यात घोषणा झाल्यानंतर सर्वच बहिणी 'लाडक्या' होत्या. त्यांना दर महिन्याला १५०० रुपये देण्यात येत होते. मात्र गेल्या काही महिन्यांपासून या योजनेसाठी अर्ज केलेल्या महिलांच्या अर्जांची पडताळणी केली जात असून निकषांत न बसणाऱ्या महिलांन वगळून फक्त गरजू बहि‍णींनाच योजनेचा लाभ देण्याचे प्रकार समोर येत आहे.
दरम्यान तालुक्यात मुख्यमंत्र्यांच्या ८४ हजार लाडक्या बहिणी आहेत. रक्षाबंधनाच्या पार्श्वभूमीवर लाडक्या बहिणींच्या खात्यात रक्कम जमा व्हायला सुरुवात झाली आहे. एकीकडे लाडक्या बहिणींना 'रक्षाबंधन गिफ्ट' तर दुसरीकडे अंगणवाडी ताईंनाही रक्कम देण्यापासून वंचित ठेवले जात आहे. योजना सुरू होण्यापूर्वी लाडक्या बहिणींचे अर्ज ऑनलाईन भरण्यासाठी सेविकांना प्रति अर्ज ५० रुपये प्रोत्साहन भत्ता देण्याचे शासनाने कबुल केले होते. परंतु वर्ष उलटूनही सेविकांना कामाची रक्कम देण्यात आली नाही. त्यामुळे सेविकाही रकमेच्या प्रतीक्षेत आहेत. प्रोत्साहन भत्ता मिळण्यासाठी अंगणवाडी ताईंच्या शासन दरबारी खेट्या सुरू असताना त्यांचा टाहो. राज्यकर्त्यांपर्यंत पोहोचायला तयार नाही. उपजिल्हाधिकाऱ्यांसह जिल्हा परिषदेच्या उपमुख्य कार्यकारी अधिकाऱ्यांकडे निवेदने देऊन उमरे झिजविले खरे; परंतु परिणाम शून्य आहे. अशा परिस्थितीत प्रोत्साहन भत्ता केव्हा मिळणार? हा प्रश्न सध्या मात्र अनुत्तरीत आहे.
अंगणवाडी ताईंना छदाम नाही
'मुख्यमंत्री माझी लाडकी बहिण योजने'च्या लाभार्थ्यांना वर्षभरापासून वेळेत अनुदान मिळत असताना या योजनेचे अर्ज भरणाऱ्या अंगणवाडी ताईंनाही अद्याप छदाम मिळाला नाही. यासंदर्भात आम्ही उपजिल्हाधिकाऱ्यांसह जिल्हा परिषदेच्या उपमुख्य कार्यकारी अधिकाऱ्यांची भेट घेऊन वारंवार निवेदने दिली. परंतु काही एक फायदा झाला नाही.
- माया म्हस्के, अंगणवाडी सेविका तथा जिल्हाध्यक्ष, शिक्षक भारती संघटना, वैजापूर
Social Plugin