आता मुदतवाढ नाही
महाराष्ट्र परिवहन विभागाने १ एप्रिल २०१९ पूर्वी नोंदणीकृत सर्व वाहनांसाठी हाय सिक्युरिटी रजिस्ट्रेशन प्लेट (HSRP Number plate registration) बसवणे बंधनकारक केले आहे. यासाठी अंतिम मुदत १५ ऑगस्ट पर्यंत वाढवण्यात आली आहे, परंतु यापुढे कोणतीही मुदतवाढ दिली जाणार नाही. यापूर्वी मार्च २०२५, एप्रिल २०२५ आणि जून २०२५ अशा तीन वेळा मुदतवाढ देण्यात आली होती, परंतु आता परिवहन विभागाने कठोर भूमिका घेतली आहे. १५ ऑगस्टनंतर एचएसआरपी नसलेल्या वाहनांवर वायुवेग पथकाद्वारे थेट दंडात्मक कारवाई होईल, ज्यामध्ये १,००० ते १०,००० रुपये दंड आकारला जाऊ शकतो.
एचएसआरपी बसवण्याच्या प्रक्रियेला अनेक अडचणींमुळे गती मिळाली नाही. महाराष्ट्रात २.१ कोटी वाहनांना ही नंबरप्लेट आवश्यक आहे, परंतु आतापर्यंत केवळ २३ लाख वाहनांवरच प्लेट्स बसवल्या गेल्या आहेत. ऑनलाइन बुकिंगमधील तांत्रिक अडचणी, फिटमेंट सेंटरवरील गर्दी, मर्यादित प्लेट्सची उपलब्धता आणि ग्रामीण भागातील जागरूकतेचा अभाव यामुळे ही मुदतवाढ देण्यात आली. नागपूरसारख्या शहरांमध्ये बुकिंग स्लॉट्स सप्टेंबर २०२५ पर्यंत भरलेले आहेत, ज्यामुळे वाहनधारकांना अडचणी येत आहेत.
कोणाला आहे बंधनकारक?
१ एप्रिल २०१९ पूर्वी नोंदणीकृत सर्व वाहनांना (दुचाकी, तिनचाकी, चारचाकी, व्यावसायिक आणि खासगी) एचएसआरपी बसवणे कायद्याने बंधनकारक आहे. यामध्ये क्रोमियम-आधारित होलोग्राम, लेसर-एच्ड युनिक आयडी आणि नॉन-रिमूव्हेबल स्नॅप लॉक असलेल्या टॅम्पर-प्रूफ प्लेट्सचा समावेश आहे. नवीन वाहनांना (एप्रिल २०१९ नंतर) ही प्लेट्स आधीच बसवलेल्या असतात.
१५ ऑगस्टनंतर काय?
१५ ऑगस्ट २०२५ नंतर HSRP नसलेल्या वाहनांवर मोटर वाहन कायद्याच्या कलम १७७ अंतर्गत ₹१,००० ते ₹१०,००० दंड आकारला जाईल. तथापि, ज्यांनी १५ ऑगस्टपूर्वी अपॉइंटमेंट बुक केली आहे, परंतु फिटमेंट नंतरच्या तारखेला आहे, त्यांना दंड लागणार नाही.
एचएसआरपी नंबरप्लेट नोंदणीसाठी १५ ऑगस्टपर्यंत मुदत वाढवून देण्यात आली आहे. ज्यांच्या वाहनांना ही क्रमांक पाटी नसेल त्यांना मात्र दंडात्मक कारवाईला सामोरे जावे लागणार आहे. याबाबत अजून आमच्या कार्यालयास मार्गदर्शक सूचना प्राप्त झाल्या नसल्या तरी त्या लवकरच प्राप्त होतील.
- स्वप्निल माने, उपप्रादेशिक परिवहन अधिकारी, वैजापूर
अशी करा नोंदणी
वाहनधारकांनी खालील पायऱ्या फॉलो कराव्या:
ऑनलाइन अर्ज: www.transport.maharashtra.gov.in किंवा www.bookmyhsrp.com वर जा.
RTO निवडा: तुमच्या वाहनाच्या नोंदणीच्या आधारावर योग्य RTO कोड निवडा.
वाहन तपशील भरा: नोंदणी क्रमांक, चेसिस क्रमांक, इंजिन क्रमांक आणि मोबाइल नंबर टाका.
अपॉइंटमेंट बुक करा:
जवळच्या अधिकृत फिटमेंट सेंटरवर तारीख आणि वेळ निवडा.
पेमेंट: दुचाकीसाठी ₹५३१, तीनचाकीसाठी ₹५०० आणि चारचाकीसाठी ₹७४५ (GST सह) फी आकारली जाते. होम डिलिव्हरीसाठी अतिरिक्त ₹१२५ (दुचाकी) आणि ₹२५० (चारचाकी) लागतात.
फिटमेंट: अपॉइंटमेंटच्या दिवशी फिटमेंट सेंटरवर वाहन आणि कागदपत्रे (RC, ओळखपत्र) घेऊन जा.
Social Plugin